Сүүлийн үед эрүүлээр турах аргуудын нэгд кето дэглэм багтаад байгаа. Тэгвэл хүссэн хүн бүхэн кето дэглэм барихгүй ажээ. Тодруулбал, нойр булчирхай, элэг, бамбай булчирхай, цөсний хүүдий өвчтэй хүмүүс кето дэглэм барих юм бол хууч өвчин сэдэрч, амь насаа эрсдэлтэй.
Кето хоолны дэглэм бол өлсгөлөнгийн үед бие мах бодийг амьд үлдэх боломжийг олгодог бодисын солилцооны дасан зохицол юм. Өөрөөр хэлбэл та элсэн чихэр, нүүрс уснаас татгалзсанаар бие тань өөх тосыг задалж өөрийгөө “тэтгэж” байдаг.
Кето хоолны дэглэм нь цусны даралт буурах, бөөрөнд чулуу үүсэх, өтгөн хатах, шим тэжээлийн дутагдалд орж зүрхний өвчин тусах эрсдэлийг нэмэгдүүлдэг. Өөрөөр хэлбэл кето дэглэм барьснаар дараах эрсдэлтэй болохыг сэрэмжлүүлж байна. Үүнд
1. Кето ханиад хүрнэ. Кето хоолны дэглэмийн эхэн үед томуу төст шинж тэмдэг илэрч болно. Энэ нь таны бие шинэ дэглэмд дасах гэж хичээж байгаа гэсэн үг юм.
2. Таны бөөрийг “стрессдүүлнэ”. Кето хоолны дэглэмд амьтны гаралтай хоол хүнс их хэрэглэх нь шээсийг хүчиллэгжүүлэх, бөөрөнд чулуу үүсэх эрсдэлийг нэмэгдүүлдэг. Энэхүү хүчиллэг байдал нь бөөрний архаг өвчний явцыг улам дордуулж болзошгүй юм.
3. Хоол боловсруулах эрхтэн хямарна. Нүүрс усыг хязгаарладаг тул кето хоолны дэглэм нь эслэг багатай байдаг. Энэ нь өтгөн хаталтыг өдөөж, гэдэсний эрүүл мэндэд сөргөөр нөлөөлж болзошгүй юм.
4. Шим тэжээлийн дутагдалд хүргэж болзошгүй. Кето хоолны дэглэм нь хэд хэдэн хоол хүнс, ялангуяа тэжээллэг чанар сайтай жимс, үр тариа, буурцагт ургамлыг хязгаарладаг тул хүний биед шаардлагатай витамин, эрдэс бодисын дутагдалд орно.
5. Ясанд хүртэл сөргөөр нөлөөлнө. Кето хоолны дэглэм нь таны ясны эрдэс нягтралыг бууруулж, цаг хугацааны явцад ясны задаралтыг өдөөж болзошгүй юм.
6. Таны архаг өвчин сэдрээж эрт нас барах эрсдэлийг нэмэгдүүлнэ.
Судлаач Рэйчел Клейнманы хэлснээр кето хоолны дэглэм барьж эхэлж байгаа зарим хүн “кето ханиад” хүрдэг. Өөрөөр хэлбэл таны ходоод кето дэглэмд дасан зохицох гэж ходоод гэдэс хямрах, толгой эргэх, эрч хүч буурах, сэтгэл санаа өөрчлөгдөх зэрэг шинж тэмдгүүд илэрдэг гэдгийг анхааруулсан.
Мөн Мэри Кондон: “Кето хоолны дэглэм нь турах, цусан дахь сахарын хэмжээг бууруулах түргэвчилсэн арга. Гэхдээ ихэнх тохиолдолд дахиад жин нэмэгдэх магадлалтай бөгөөд ингэхдээ турсан жингээсээ ихээр таргалах болно.” Гэдгийг хэлсэн.
Дээрх судлаачид болох Кондон, Клейнман нар хоёулаа кето хоолны дэглэмийг өвчтөнүүддээ санал болгохгүй гэж хэлсэн байна. Учир нь дэглэмээр турах нь эцсийн эцэст бодит бөгөөд тогтвортой байдал биш гэдгийг онцолсон юм.
Эх сурвалж:
www.uchicagomedicine.org
Орчуулж, бэлтгэсэн А.Маша
