Монголын кино урлагт “Ларьдма” киноны дүрээр цоо шинэ хувьсгал хийж, өөрийнхөө ур чадварыг харуулж явсан жүжигчин бол О.Гэрэлсүх.
Өдгөө 50 насны босго алхсан тэрээр алдарт “Ромео Жульетта” жүжгийн гол дүр болох Ромеод 150 гаруй удаа тоглосон гэдгээрээ алдартай. Тэрээр өнөөдөр нээлтээ хийж буй “Хотулун гүнж” киноны нээлтэд оролцож, олны дунд хээв нэг алхаж явна лээ.
Жүжигчин эрийн хувьд саяхан Алтангадас одонгоор энгэрээ мялаасан. УДЭТ-аар эргэн овоглох болсон тэрээр 33 жилийн турш соёл урлагийн салбарт зүтгэсэн байгаа юм. Тэрээр бага наснаасаа эхлэн Монголын хүүхдийн ордны Драмын дугуйлангаас жүжигчин болох гараагаа эхлэж байсан бөгөөд 1996 онд анхны Ромео болон драмын театрын тайзнаа гарч ирж байсан юм.
Түүнээс хойш тайз дэлгэцийн олон уран бүтээлүүдэд тоглосоноос дурьдвал С.Жаргалсайхан “Хаан түүх” жүжиг, У.Шекспир “Ромео Жульетта”, О.Нил “Тамын дурлал”, “Энхтуул” хошин жүжиг, Дариа Фо “Чөлөөт хос” жүжиг, Э.Оюун “Би эндээс явахгүй” жүжиг гээд 20 гаруй жүжгийн гол ба туслах дүр, “Замын хүн” жүжгийн найруулагчаар ажиллаж, “Ларьдма” УСК, “ТюТю” УСК, “Амьдралын нахиа” УСК, “Модон могой” УСК, “Мамма Миа” музыкл кино гэх мэт 40 гаран дэлгэцийн уран бүтээлийн гол ба туслах дүрүүдийг амжилттай бүтээж, театр урлаг судлаач, шүүмжлэгч, мэргэжил нэгт уран бүтээлчдийн зүгээс өндөр үнэлгээ авч, үзэгч олны талархлыг хүлээж байсан.
