Монголын сор болсон сайхан бүсгүйчүүдийн нэг бол Монгол Улсын Гавьяат жүжигчин Н.Батцэцэг. Түүний “Суварган цэнхэр уулс” киноны сурвалжлагч бүсгүй, “Гэрлэж амжаагүй явна” киноны Сүрэн, “Жинжиймаа” киноны алаг нүдэн, “Газарчин” киноны индиан эмэгтэй зэрэг олон сайхан дүр үзэгчдийн сэтгэлд хоногшин үлдсэн.
Өдгөө 65 настай тэрээр үеийнхнээ өнгөлсөн толиотой, жавхаатай нэгэн. Тэрээр 1957 онд Улаанбаатар хотод төрөөд 6 дугаар дунд сургууль 1974 онд төгсөсний дараа МУИС-ийн Орос хэлний багш орчуулагч мэргэжлээр 1979 онд төгссөн байна.
Түүний төрсөн эцэг Ц.Нацагдорж Монголын хувьсгалт залуучуудын эвлэлийн төв хороонд заа¬варлагч, нарийн бичгийн дарга, Дарханы Нэхий эдлэлийн үйлдвэрийн дарга, Архангай аймгийн Цэцэрлэг хотын дарга, Увс аймгийн Сагил сумын нэгдлийн дарга зэрэг ажлуудыг хийж явжээ.
Харин хойд эцэг Ц.Хасбаатар нь хэл бичгийн ухааны доктор, СГЗ орчуулагч хүн байсан аж.
Жүжигчин бүсгүйн ээж Б.Цэрэнлхам залуудаа Драмын театрын жүжигчин байсан гэдэг. Зургаан жил ажиллахдаа “Кремлийн цаг”, “Эмч нар”, “Тожоо жолооч”, “Санасан ёсоор болтугай” зэрэг жүжгийн гол дүрийг бүтээж байжээ.
Удам судраас нь харахад тэрээр удам залгасан урлагийн хүн, сэхээтэн гэхэд болно.
