Мэргэжил бүхэн сайхан. Олонд үлгэр дуурайл болж, тайз дэлгэцэн дээр дүрийг “амилуулж” чаддаг гэдгээрээ жүжигчний мэргэжил онцлог билээ.
Тэгвэл “Бүтэн амьдрал” киноны Цэнгэлмаагийн дүрээр олонд танигдсан Жүжигчин Э. Пүрэвжаргал буюу Пунтик өнөөдөр 29 насны төрсөн өдрөө тэмдэглэж байна. 
Тэрээр найз нөхөд, гэр бүлийн хүрээнд Зайсан Хилл-д хүлээн авалт өнөө орой 19 цагт зохион байгуулахаар болжээ.
Түүний намтраас сонирхуулахад, Эрдэнэбилэгийн Пүрэвжаргал 1993 оны 02-р сарын 11-нд Дархан-Уул аймагт төрсөн. Түүнийг Пунтик гэж хочилдог. Түүнийг гурван настай байхад Улаанбаатарт нүүж ирж байжээ. 
Тэрээр айлын бага нь. Нэг ахтай. Тэрээр 2014 онд “Зохиомж” дээд сургуулийг Монгол Улсын төрийн соёрхолт Ц.Төмөрбаатар, Соёлын тэргүүний ажилтан А.Цэгмид багшийн удирдлага дор төгсчээ.
Түүний хамгийн анхны дүр нь “Эглийн гайхамшиг” гэдэг арилжааны бус кинонд Гэгээнээ хэмээх гол дүр байв. 
Арилжааны бус гэдэг нь кино театраар гарахгүй телевизээр гардаг киног хэлдэг ажээ. Хоёр дахь дүр нь “Сүүлчийн шөнө” МУСК байсан. Уг кинонд охид амар хялбар аргаар амьдарч байна гэдгийг харуулах зорилготой дүр. Энэ нь түүний анхны эсрэг дүр. Түүнээс хойш гадаад, дотоодын олон бүтээлд гол болон туслах дүр дээр ажилласан байна. 
Тэрээр “Сүүлчийн шөнө”, “Ороолон”, “Богд хаан”, “Админ Z”, “Хөхөөний үүр”, “Мөрдөгч”, “7-р тусгай тасаг”, 37-р точка” зэрэг 20 гаруй уран сайхны киноны гол болон туслах дүрд ажилласан байдаг.
Түүний хамгийн том мөрөөдлүүдийн нэг нь Холливудын кинонд тоглох. Ялангуяа “Avangers” шиг адал явдалт, тулаант цуврал киноны эмэгтэй баатрын дүрд тоглохыг мөрөөддөг гэнэ лээ.“Авьяаслаг бүсгүй гэр бүлтэй бөгөөд түүний нөхрийг А.Нямдаваа гэдэг.
Математикийн программ хангамж мэргэжилтэй. Хос нэг хүүтэй. Тэдний хүүг Н.Ханхүү гэдэг. Хүүгээ ханхүү шиг хайрлаж, өсгөхийг билэгдэж, энэ нэрийг Э.Пүрэвжаргал өгчээ.
