Гэмт хэрэгт шалгагдаж буй этгээдээс тайлбар авахдаа дуу, дүрсний бичлэг хийдэг. Мөн цагдаагийн алба хаагчдын албан өрөөнд камер байрлуулж болзошгүй эрсдэл бүрээс сэргийлдэг болсон. үүнтэй холбоотойгоор цагдаа нарын эрүүдэн шүүх арга нарийсч, камергүй газар буюу 00-ын өрөөнд зоддог болсон байх юм. Бид энэ талаар сэрэмжлүүлэх зорилгоор мэдээлэл бэлтгэлээ.
Монгол улсын иргэн Г.Б гэгч нь 2021 оны 3 дугаар сарын 26-ны өдөр Нэгдсэн Үндэсний Байгууллагын 1971 оны “Сэтгэцэд нөлөөт бодисын тухай конвенц”-ийн 2 дугаар жагсаалтад багтсан “Өвс” гэх нэршилтэй дельта-9 тетрагидроканнабинолын агууламжтай сэтгэцэд нөлөөт 1.8 гр бодисыг худалдаалах зорилгогүйгээр, хууль бусаар хадгалж байхдаа цагдаа нарт баригдаж, эрүүлжүүлэгдсэн байна.
Түүнийг эрүүлжүүлэхэд хүлээн өгөх үеэр биед нь ямар нэгэн шарх, гэмтэл байгаагүй бөгөөд энэ өдрийн дараанаас биеийнх нь цөөнгүй хэсэгт хөхөрсөн бөгөөд шалтгаан нь цагдаагийн алба хаагчид эрүүдэн шүүсэнтэй холбоотой болох нь нотлох баримтуудаар нотлогджээ.
Тодруулбал, хар тамхи хэрэглэсэн байж болзошгүй этгээдийг эрүүлжүүлэн, улмаар хар тамхины гэх хэргийг нь шалгахаар Сонгинохайрхан дүүргийн цагдаагийн III хэлтэст авч ирсэн байна. Энэ үеэр төрийн албан хаагч буюу Сонгинохайрхан дүүрэг дэх Цагдаагийн газрын Гуравдугаар хэлтсийн Эрүүгийн цагдаагийн тасгийн эрүүгийн ахлах мөрдөгч Б.Б-г цагдаагийн хэлтэст Г.Б-д хандан “…чам шиг ийм хүмүүс зөндөө орж ирдэг юм” гээд зүүн хацар руу хоёр удаа алгадаж унагасан бөгөөд “баашлаад байгаарай, бос” гээд зүүн хөлийн шилбэний урд хэсэг рүү өшиглөсөн байна. Улмаар түүнээс шээсний шинжилгээ авах зорилгоор 00-ын өрөөнд байхад Сонгинохайрхан дүүрэг дэх Цагдаагийн газрын Гуравдугаар хэлтсийн Эрүүгийн цагдаагийн тасгийн эрүүгийн мөрдөгч Д.Б, П.Ч нар бичлэг хийж, хаанаас өвс авсныг хэлүүлэх зорилгоор зодож, цохисон бөгөөд энэ хэрэг нь гэрчтэй ажээ. Үүгээр ч зогсохгүй зодож, эрүүдэн шүүсэн гэх хэрэг нь Шүүхийн шинжилгээний үндэсний хүрээлэнгийн шинжээчийн дүгнэлтээр нотлогддог байна. Тодруулбал, “хар тамхичин” Г.Б цагдаа нарт зодуулсан гэдэг нь Шүүхийн шинжилгээний үндэсний хүрээлэнгийн 2021 оны 4 дүгээр сарын 03-ны өдрийн 2973 дугаартай “… Г.Бын биед зүүн бугалга, 2 гуя, 2 шилбэний цус хуралт, цээжний зүүн талын зөөлөн эдийн няцрал гэмтэл тогтоогдлоо. Дээрх гэмтэл нь мохоо зүйлийн хэд хэдэн удаагийн үйлчлэлээр үүсгэгдэнэ. Учирсан гэмтэл нь тухайн цаг хугацаанд үүссэн хуучин гэмтэл байна.” гэх дүгнэлтээр нотлогддог байна.
Тиймээс “хар тамхичин” АТГ-т хандан цагдаа нарыг шалгуулснаар эрүүдэн шүүсэн гэх хэрэг илэрсэн байгаа юм. Эрүүдэн шүүсэн гэх хэргээр АТГ-т шалгагдаж байсан цагдаа нарын нэг болох П.Ч хар тамхины хэргийг хаахаар хууль бус үйлдэл хийсэн. Тодруулбал, 2021 оны 4 дүгээр сарын 06-ны өдрийн өөрийнхөө тогтоолын дагуу хийгдсэн Шүүхийн шинжилгээний Үндэсний хүрээлэнгийн Тусгай шинжилгээний газрын химийн лабораторийн шинжээч Д.Золзаяагийн 2021 оны 04 дүгээр сарын 14-ний өдрийн 1928 дугаартай дүгнэлтийг дээрх гомдол, мэдээллийг шалгасан материалд хавсаргалгүйгээр 2021 оны 4 дүгээр сарын 17-ны өдөр “Хэрэг бүртгэлтийн хэрэг нээхээс татгалзах тухай” 1109 дугаартай санал гаргаж Сонгинохайрхан дүүргийн прокурорын газарт материалыг шилжүүлж хэрэг хянан шийдвэрлэхэд ач холбогдол бүхий нотлох баримтыг устгасан болох нь нотлох баримтуудаар нотлогддог ажээ.
Улмаар хар тамхи хэрэглэсэн иргэн, бусдыг эрүүдэн шүүсэн гэх цагдаа нарыг гэм буруутай гэж Сүхбаатар дүүргийн Эрүүгийн хэргийн анхан шатны шүүхээс үзсэн. Бусдыг эрүүдэн шүүсэн цагдаа нарт Эрүүгийн хуулийн 21.12.1, 21.12.2-т зааснаар гэм буруутайд тооцож цагдаа нарыг долоон сая төгрөгөөр торгосон.
Мөн хар тамхины хэргийг шалгаж байгаад, нотлох баримтыг “нуун дарагдуулж” хэргийг нуусан цагдаад нэмэлтээр таван сая дөрвөн зуун мянган төгрөгөөр торгох ял оноосон юм.
Харин эрүү шүүлтэд өртсөн гэх Г.Б нь хар тамхи хэрэглэсэн гэм буруутай нь тогтоогдож, нэг жилийн хорих ял авсан бөгөөд уг ялыг нь тэнсэн харгалзсан ажээ.
А.Баярмаа
