Нүүрсний хулгайчдын нэрсийг ил болгож, хариуцлага тооц хэмээн уриа лоозон барьж залуусын жагсаалыг удирдаж байсан Эмоци продакшны жүжигчин У.Цогтбаярыг гэр бүлийн хүчирхийлэл үйлдэж, эхнэрээ хэл амаараа доромжилсон хэргээр ХУД-ийн цагдаагийн 2 дугаар хэлтэст шалгаж эхэлсэн байна.
Тодруулбал, Хан-Уул дүүрэг дэх цагдаагийн газрын хоёрдугаар хэлтэст 2023 оны дөрөвдүгээр сарын 30-ны өдөр “ХанУул дүүргийн дөрөвдүгээр хороонд “эмэгтэй хүн хурдлаарай” гэх дуудлага мэдээлэл цагдаагийн байгууллагад бүртгэгдсэн байна. Дээрх мэдээлэлд зөрчил шалган шийдвэрлэх ажиллагаа явуулан 2023 оны тавдугаар сарын 01-ний өдөр холбогдогч У.Цогтбаяраас холбогдогчоор мэдүүлэг авчээ.
Түүнд Зөрчлийн тухай хуулийн 5.2 дугаар зүйлийн 1 дэх хэсгийн 1.1 дэх хэсэг, Зөрчлийн тухай хуулийн 8.8 дугаар зүйлийн 1 дэх хэсгийн 1.1 дэх зааснаар Зөрчлийн хэрэг нээх тухай эрх бүхий албан тушаалтны тогтоол үйлдэж Хан-Уул дүүргийн прокурорын газрын хяналтын прокурорт зөрчлийн хэрэг нээн шалгаж байна.
