Оросын холбооны улсын Москва хотод зохион байгуулагдсан аугаа их эх орны дайны ялалтын 80 жилийн ойн цэргийн ёслолын жагсаалд Монгол улсын зэвсэгт хүчнээс оролцсон бүрэлдэхүүнд БХЯ, Зэвсэгт хүчний Жанжин штабаас хүндэтгэл үзүүллээ.
Зэвсэгт хүчний Жанжин штабын дарга хошууч генерал С.Ганбямба ёслолын жагсаалд оролцсон бүрэлдэхүүнд хандаж үг хэлэхдээ “Дайны жилүүдийн хүнд цаг үед бие биедээ харилцан туслалцаж, Монгол Улсын тусгаар тогтнол, газар нутгийн бүрэн бүтэн байдлын төлөө халуун амь, бүлээн цусаа урсгасан ОХУ-ын эрэлхэг дайчдын гавьяаг бид мартах учиргүй билээ. Энэхүү түүхэн замналын илэрхийлэл болж Монгол цэргийн цог золбоо хийморийг гайхуулан Москва хотын улаан талбайд гурав дахь удаагаа алхсан Зэвсэгт хүчний дайчид Та бүхнээрээ Монголын ард түмэн бахархаж байна хэмээн, Аугаа их Эх орны дайны ялалтын 80 жилийн ойн бахархам түүхийг бүтээсэн Зэвсэгт хүчний шилдэг дайчдадаа эх орноо хамгаалах ариун үүрэгт нь өндөр амжилтыг хүсэн ерөөе” хэмээв.
Мөн энэ үеэр Цэргийн ёслолын жагсаалд оролцсон бие бүрэлдэхүүнд хүрэлцэн ирсэн хүндэт зочид ЗХЖШ-ын гарын бэлэг гардуулсан юм.
ОХУ-ын Москва хотын Улаан талбайд Аугаа их Эх орны дайны ялалтын 80 жилийн ойн цэргийн ёслолын жагсаалд монгол цэргийн цог жавхаа, сүр хүчийг тодотгож харуулж чадсан Монгол Улсын Зэвсэгт хүчний алба хаагчдад өнөөдөр Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх баяр хүргэж, хүндэтгэл үзүүлсэн. Энэ үеэр Ерөнхийлөгчийн зарлигаар зарим алба хаагчид цэргийн одон медалиар шагнагдахын зэрэгцээ монгол цэргүүдээ командлан алхсан Зэвсэгт хүчний 032 дугаар ангийн захирагч дэд хурандаа Э.Билэгсайханд ЗХЖШ-ын даргын тушаалаар албан тушаалын зэрэглэлийн хурандаа цол олгогдсоныг энэ өдөр гардуулан өгч, баяр хүргэлээ.
Ташрамд сонирхуулахад ялалтын парадад оролцсон бүрэлдэхүүн 2025 оны 05 дугаар сарын 25-ны өдөр Буянт-Ухаад болох Монгол улсад Нисэх хүчин үүсэж хөгжсөний 100 жилийн ойн цэргийн ёслолын жагсаалд оролцох юм.
