Монгол Улсын Их Хурлын 2025 оны намрын ээлжит чуулганы өнөөдрийн /2025.10.24/ нэгдсэн хуралдаанаар хэд хэдэн чухал асуудал хэлэлцэнэ.
Өглөөний 10:00 цагт “Их хуралдай” танхимд Монгол Улсын 2026 оны төсвийн тухай хуулийн төсөл болон түүнтэй хамт өргөн мэдүүлсэн хууль, тогтоолын төслүүдийг хэлэлцэх эсэхийг шийднэ. Энэ үеэр асуулт, хариулт 120 минут үргэлжлэх юм. Мөн зарим Байнгын хорооны бүрэлдэхүүнд өөрчлөлт оруулах тухай асуудал, 2026 оны төсвийн хүрээний мэдэгдэл болон 2027-2028 оны төсвийн төсөөллийн тухай хуулийн төслийн гурав дахь хэлэлцүүлгийг хийхээр төлөвлөжээ.
Үдээс хойш 14:00 цагаас “Хянан шалгах түр хороо байгуулах тухай” УИХ-ын тогтоолын төслийг хэлэлцэнэ. Энэхүү төслийг УИХ-ын гишүүн Л.Оюун-Эрдэнэ нарын 33 гишүүн өргөн мэдүүлсэн байна. Мөн Үндсэн хуулийн цэцэд хүсэлт гаргах саналын тухай асуудлыг хэлэлцэхээр төлөвлөсөн байна.
