Нийслэлийн Мэргэжлийн хяналтын газар (НМХГ)-ын Экспорт, импорт, хорио цээрийн хяналтын хэлтсийн даргаар ажиллаж байсан Н.Гэрэлт-Од, нэгэн компанийн захирал Ц.Жаргалсайхан нарт холбогдох хэргийг Чингэлтэй дүүргийн Эрүүгийн хэргийн анхан шатны шүүх уржигдар хэлэлцээд гэмт хэргийн бүрэлдэхүүнгүй гэсэн үндэслэлээр хэргийг хэрэгсэхгүй болгож, холбогдогчдыг цагаатгав. Ц.Жаргалсайхан нь 2018 оны арванхоёрдугаар 17-нд хилээр гаргах түүхий эддээ хяналт шалгалт хийлгэж, байцаагч томилуулан дүгнэлт гаргуулахаар хандсан аж.
Энэ үед нь шинэ жил дөхсөн, байцаагчдынхаа хүүхдүүдийг баярлуулахын тулд НМХГ-ын дээрх албан тушаалтан компанийн захирлаар 800 мянган төгрөгийн үнэ бүхий бэлэг бэлдүүлсэн нь хээл хахууль авсан, өгсөн гэх үндэслэлээр шалгуулах шалтгаан болж. Өөрөөр хэлбэл, өөртөө давуу байдал бий болгохын тулд НМХГ-ын хэлтсийн даргад бүрэн эрх, албан тушаалын байдалтай нь холбогдуулж хахууль өгсөн гэж прокурор буруутган яллах дүгнэлт үйлдсэн байна.
Чингэлтэй дүүргийн Эрүүгийн хэргийн анхан шатны шүүх өмнө нь 2020 оны аравдугаар сард хэлэлцээд мөн л гэмт хэргийн бүрэлдэхүүнгүй гэж үзэн цагаатгаж байсан ч прокурор эсэргүүцсэнээр нийслэлийн Эрүүгийн хэргийн давж заалдах шатны шүүхээс дахин хэлэлцүүлэхээр буцаасан юм.
