Банк бол цэвэр хэрэглэгчийнхээ ИТГЭЛЦЭЛ дээр оршин тогтнодог онцгой бизнес. Гэтэл 2,7 сая хэрэглэгчтэй “Хаанбанк” хууль зөрчиж, хэрэглэгчээ хохироосоор байна.
Хэрэглэгч нэг л өглөө босоод ирэхэд Хаанбанкны дансанд байсан бүх мөнгө нь алга болох хэвийн үзэгдэл боллоо. Мөнгөө алдсан хэрэглэгч Хаан банкинд хандахад өөдөөс нь “цагдаад өг ” гэж хэлээд сууж байна.
Тэр ч байтугай хэрэглэгчийнхээ дансны мэдээлэл буюу орлого, зарлагыг он оноор нь жагсааж гаргаад хэрэг болсон нэгэнд нь өгчихсөн ч байх шиг. Өнөөдүүл нь жирийн иргэний байрны урьдчилгаанд шилжүүлсэн 80 сая төгрөгийг “сэжиг бүхий гүйлгээ” гэж ирээд хэвлэлээр цацаж байна. Хувийн компаний дансыг улс төрчдийн захиа даалгавараар хаасан …. гээд Хаанбанкны хэрэглэгчийнхээ бизнес, нэр хүндэд халдаж, хохироосон жишээг тоочиж дуусашгүй. Хууль зөрчсөн банкинд хариуцлага тооцох газар Монголд алга.
“Хаанбанк”-ны эзэд хэн бэ?
Тус банкны 60 орчим хувийг Японы “Савада Холдингс” компани эзэмшдэг бол 40 орчим хувийг нь “Таванбогд трейд”-ийн Ц.Баатарсайхан, түүний эхнэр Д.Хулан нар эзэмшдэг ажээ. “Савада Холдингс”-ийн хувьцааг зарах асуудлаар маргаан үүсээд буй өнөөдрийн хувьд “Хаанбанк”нд үүсээд байгаа энэ асуудлыг шийдвэрлэх хамгийн том эрх мэдэлтэн нь Ц.Баатарсайхан болж байна. Хаанбанк хэрэглэгчдээ хэрхэн яаж хохироосныг та мэдэхгүй байгаа бол, магадгүй гүйцэтгэх удирдлагууд тань хувьцаа эзэмшигчдээсээ нуугаад өнгөрдөг бол, магадгүй миний бичсэн энэ зүйлийг худал гэж үзвэл хууль зөрчсөн баримтуудыг надаас аваарай. Хохирсон хүмүүстэй нь уулзсан ч болно. Танай банкийг сайндаа ч биш. Хөдөө орон нутагт зарим банкны салбар байхгүй учраас хүчээр хэрэглэгч чинь болж явдаг юм штэ.
“Хаанбанк”-ны хэрэглэгчид данснаас мөнгөө алдаж, хувийн дансны мэдээллээ алдсаар байгаа нөхцөлд төрөөс олгосон тусгай зөвшөөрлийг нь яагаад хурааж болохгүй гэж?
Б.Отгон
