Өнгөрсөн жилийн өдийд “Хархан нүдэн” анхны тоглолтоо хийсэн даруйдаа короновирусын анхны тохиолдлын ойрын хавьтагчдыг “бий болгосон” гэх дуучин Д.Дэмбэрэлнямбуу “Мойл хархан нүдэн” дуугаа хийхээр болжээ.
Тэрээр тоглолтынхоо дараагаар үзэгчидтэйгээ хамт олон хоног ХӨСҮТ-д хөл хорионд байж, олны хараа хэл амнаас дайжин амьдарсан гэнэ. Харин саяхнаас дахин уран бүтээлдээ орж, “Мойл хархан нүдэн” гэдэг дуу гаргаж байгаа аж.
Энэ тухайгаа тэрээр “Нүд чинь чинь эмэгтэй хүний үзэсгэлэнг чимж өгч байдаг магтахаас өөр аргагүй бүтээл шүү дээ.“Хархан нүдэн” тоглолт 2020 оны арваннэгдүгээр сарын 8-нд болсон юм. Харин Монгол Улсад дотооддоо коронавирус алдсан гээд л арваннэгдүгээр сарын 10-11-нд шилжих шөнө бөөн юм болсон. Эхлээд “Хархан нүдэн” тоглолтыг дуучин Д.Найдандорж тоглолттой андуурч, холбогдох байгууллагаас шөнийн 03:00 цагийн үед Д.Найдандорж руу ярьж, баахан шалгаасан байна лээ.Харин дараа нь Д.Найдандорж тоглолтын багийн нэг хүн ээжтэй минь эхэлж холбогдоод тэр тухай хэлсэн юм.
Тэгсэн ээж маань надад хэлэхдээ “Нэг хүн чамаар тоглох гээд байх шиг байна” гэж билээ. Намайг эмнэлгийнхэн ирж авахдаа голдоо эмнэлгийн том автомашинтай гурван машины цуваа л төв замаар дуут дохио хангинуулаад л сүртэй юм л болж байсан. Тэгсэн одоо бүр коронавирус тусаад “Ирээд аваач” гэсэн ч тоохгүй болжээ. Тэр үед манай гэр бүл, хөдөөнөөс ирсэн ах, дүүс гээд 10 гаруй хүнийг хорооллын нэг зочид буудалд тусгаарласан. Би ч тусгаарлалтад ороод шууд л гар утсаа унтраачихсан. Тухайн үед ч хэвлэлийнхэн, цагдаа, онцгой гээд л олон газраас залгаж, гар утас байнгын дуугараад болж өгөхгүй байсан юм. Гэхдээ би үүнд нэг их эмзэглэж, ач холбогдол өгөөд байдаггүй. Жил орчим хугацаанд цахим сүлжээ бага хэрэглэж, дахин үзэгч, сонсогчидтойгоо холбогдож харилцаж үзээгүй л байгаа.
Фэйсбүүк сүлжээн дэх өөрийн хуудсаа устгачихсан байж байгаад саяхнаас л дахин нээж, идэвхжүүлж байна” гэжээ.
