Нэгэн үе хошин урлагт Амбий, Бооёо, Хүрлээ гэсэн нэрс шадар гурван цэрэг гэдэг шиг салгаж хэлж боломгүй тийм л нэрс байлаа.
Үнэнч нөхөрлөлөө зарлан тунхаглаж байсан гурван найз “Шинэ үе” хамтлагаа үүсгэн байгуулж байсан ч цагийн аясаар өөр өөрийн уран бүтээлийг хөөж, хамтлагаасаа өрх тусгаарлацгаасан.
Гэхдээ хамтлагаа орхисон Амбий өдгөө тэнгэрт одсон бол, Бооёо өнөөдрийг хүртэл хошин урлагийн тайзаа ч уран бүтээлээ ч орхиогүй яваа.
Бууриа сахин үлдсэн Бооёо “Шинэ үе” хамтлагаа залуу жүжигчдээр сэлбэж, оюутан залуус дундаас шалгаруулалт хийж, ирээдүйн чадварлаг жүжигчдийг бэлтгэдэг гэдгээрээ алдартай. Тус хамтлагаас ажил амьдралынхаа гарааг эхлүүлж, олонд танигдсан хүн цөөнгүй. Хамтлагтаа эмэгтэй гэхээсээ илүү эрэгтэй жүжигчдийг авдаг МУГЖ Н.Ариунболд буюу Бооёогийн дэргэд өдгөө үнэнчээр үлдсэн хоёрхон эмэгтэй жүжигчин байдаг аж. Тэд бол жүжигчин Д.Оюунтуул, Х.Оюунтунгалаг нар.
