Дэнжийн 1000-аас авсан хонины махнаас бууны сум гарч иржээ

Нэгэн иргэн цахим хуудаснаа оройн хоолоо хийхээр мах хөшиглөж байтал бууны сум гарч ирсэн тухайгаа онцлоод, малчид малаа буудаж алдаг болсон юм уу, хэмээн бичжээ.
Иргэн тус хонины махаа иргэд бидний ярьж заншсан “Дэнжийн 1000” буюу Хүчитшонхор захаас худалдан авсан байна.
Өнгөрсөн өвөл нийт нутгаар цаг агаар сайхан байсан тул мал сүрэг зуд турханд зутралгүй онд мэнд орж байна. Таван хошуу малын тоо толгой 66 саяд хүрч, түүхэн дээд амжилт тогтоов. Гэхдээ цаг агаарын таатай байдал малын хулгайг нэмэгдүүлдэг сөрөг талтай аж. Учир нь малчид малаа нядлах нь цөөрч, ингэснээр махны хомсдол үүсэх нь зах зээлийн хууль. Хомсдол үүссэн үед зах зээлийнхээ зарчмаар үнэ нэмэгддэг зүй тогтол махны үнийг ч дайрсангүй. Харин махны үнэ ийн нэмэгдсэн нь урт гартнуудад хулгай хийх сэдэл төрүүлжээ.
“Махны үнэ өссөн нь малын хулгай нэмэгдэх үндсэн шалтгаан болж байна. Мөн нийт нутгаар цас бага унасан нь малын хулгайч нарт таатай боломж олгосон гэсэн үг. Өмнө нь тэд машинаа засч янзлаад, туулах чадварыг нь нэмэгдүүлж байж малын бэлчээрт очдог байсан бол одоо приустэй давхиж очоод л малыг нь нядлах хулгайлсан тохиолдол хүртэл гарах болов. Хамгийн гол нь малчид өөрсдөө сонор сэрэмжээ дээшлүүлэхгүй бол малчин болгоны гадна цагдаа нар манана гэж байхгүй шүү дээ” хэмээн Эрүүгийн цагдаагийн албаны Хулгайн гэмт хэрэгтэй тэмцэх хэлтсийн ахлах мөрдөгч, дэд хурандаа Г.Бөхчулуун ярьсан удаатай.
Хулгайч нар нядалсан малаа махны ченжүүдэд нийлүүлэх замаар үгүй хийдэг. Уг нь Монгол Улсад зарагдаж буй мах бүхэн гарал үүслийн гэрчилгээтэй байх ёстой ч энэ журам амьдралд хэрэгждэггүй нь малын хулгай гаарах үндэс болжээ. Өдгөө хулгайч нар ямар нэгэн малын эмчтэй ярьж байгаад гарал үүслийн гэрчилгээ бичүүлээд авчихдаг болсон байна. Тиймээс цагдаа нар шалгасан ч өнөөх бичгээ хээвнэг үзүүлчихээд явж одно. Энэ бичгийг нь тулган харж, үнэхээр тухайн малчны мал мөн эсэхийг нягталж шалгадаг механизм одоогоор алга. Тиймээс өнөөх цаасыг нь үзээд өнгөрөөхөөс аргагүйд хүрдэг тухай албаныхан учирлаж хэлдэг.