–Борын Ганзориг хэмээх хэвлэл мэдээллийн салбарт ажилладаг залууг түүний хэрэгт холбогдуулав-
“Багануур” ХК-ийн гүйцэтгэх захирал Э.Номинчулууныг өчигдөр бусдад давуу байдал олгосон хэд хэдэн гэрээ байгуулж их хэмжээний хахууль авч байх үйлдэл дээрх нь АТГ-ын ажилтнууд дайчлан баривчилж, мөрдөн шалгах ажиллагаагаа үргэлжлүүлж байна.
Эх сурвалжуудын мэдээлснээр тэрбээр 3000 ам.доллар бусдаас авч байсан гэнэ. Э.Номинчулуунд холбогдох хэргийг ЭЦА-наас АТГ-т шалгуулахаар шилжүүлээд удаагүй.
Тус газарт шалгуулж байхдаа ийнхүү дахиад гэмт хэрэг үйлдсэн учраас 48 цагийн хугацаатай албадан саатуулсан байна. Ингэснээр түүнд эрх мэдэл албан тушаалаа урвуулан ашигласан, бусдад давуу байдал олгосон гэх үйлдлээс гадна хээл хахууль авсан хэмээх үндэслэлээр нэмж шалгаж эхэлж буй.
Түүний эл хэрэгт ulstur.mn хэмээх цахим хуудсыг үүсгэн байгуулсан, нийслэлийн Сэтгүүлчдын нэгдсэн холбоо ТББ-ын тэргүүн Борын Ганзоригийг холбогдуулж, нэгжлэг байцаалт хийсэн байна.
Эх сурвалжуудын хэлж буйгаар Э.Номинчулуунтай холбоотой хууль зөрчсөн байж болзошгүй гэх мэдээллүүдийг нь хэвлэлд бичихгүй байхаар тохиролцож, хэд хэдэн гэрээ байгуулан мөнгө өгч, авсан үйлдэлд тэднийг хамтатган шалгаж байгаа аж.
Э.Номинчулууныг ЭЦА-ныхан өнгөрсөн сард шалгаж эхэлсэн талаар бид цаг тухайд нь мэдээлсэн.
Түүнийг “Багануур” ХК-иас зарласан өндөр үнийн дүнтэй тендерт “Тавинлан” гэдэг компанийг шалгаруулан ажил гүйцэтгэх явцад нь төсөвт өртгийг нэмж, зургаан тэрбум төгрөгийн санхүүжилтийг найман тэрбум болгон өсгөсөн. Улмаар илүү гарсан мөнгийг тендерт шалгарсан аж ахуйн нэгжийнхэнтэй нийлж завшсан хэрэгт буруутгасан. “Тавинлан” ХХК-ийн захирал Х.Цогнойжамцаас “Алтаргана” хотхонд 500 сая төгрөгтэй тэнцэх тансаг зэрэглэлийн таван өрөө орон сууц бэлгэнд авсан гэх үйлдэлд Э.Номинчулууныг холбогдуулан шалгаж байгаа билээ.
