Ерөнхийлөгч У.Хүрэлсүхийн ивээл дор “Нийтийн хөлбөмбөг” төслийн хүрээнд “UB CUP 2022” тэмцээн энэ сарын 8-нд эхэлнэ. Улаанбаатар хотын аварга шалгаруулах тэмцээнийг анх удаа Сүхбаатарын талбайд зохион байгуулах юм. Ингэхдээ төв талбайд 90X45 харьцаатай хөл бөмбөгийн хиймэл зүлэг дэвсчээ.
Чухам хэдэн төгрөгийг санхүүжилттэй төсөл гэдэг нь нууц хэвээрээ. Зохион байгуулагчдын зүгээс ирэх онд болох хөлбөмбөгийн ДАШТ-нийг угтаж ийнхүү төв талбай дээрээ тэмцээн хийж буй гэх.
Улаанбаатар хотын аварга шалгаруулах тэмцээнд нийслэл есөн дүүргийн шигшээ багууд оролцох юм. Одоогоор Баянгол, Сүхбаатар, Сонгинохайрхан, Хан-Уул, Чингэлтэй дүүрэг бүртгүүлжээ. Тэмцээний техникийн зөвлөгөөн энэ сарын 5-нд Монголын хөлбөмбөгийн холбооны байранд болж, оролцох багууд тодорхой болох юм.
Аваргын цомыг хүртсэн дүүргийн шигшээ баг Увс аймгийн Улаангом суманд болох 21 аймгийн аварга шалгаруулах тэмцээний дээд шатанд түрүүлсэн аймгийн шигшээ багтай үндэсний цомын төлөөх финалын нэг тоглолт хийнэ. Сануулахад, 2012 онд Сүхбаатарын талбайд бүх нийтийн хөлбөмбөгийн баярыг зохион байгуулж байв. Тухайн үед “Хүүхэд-хөлбөмбөг-ирээдүй” хөтөлбөрийг Монголын хөлбөмбөгийн холбоо санаачлан Засгийн газрын хэрэгжүүлэгч агентлагтай хамтран зохион байгуулсан удаа бий.
