Монголын кино урлагт сүүлийн жилүүдэд туслах дүрүүдийг гол дүр шиг чимж явдаг авьяаслаг уран бүтээлчид олон төрсөн. Тэдний нэг бол жүжигчин О.Дуламсүрэн.
“Бүтэн амьдрал” киноны дэлгүүрийн эгчийн дүрээр олны анхаарлыг татаж, хайр хүндэтгэлийг хүлээж яваа тэрбээр өнгөрсөн хугацаанд “Наран мандах нутаг”, “Бүтэн амьдрал”, “Хавтаст хэрэг”, “Эрвээхэйн сүүдэр”, “Миний хайртай Пабло” зэрэг 20 гаруй дэлгэцийн бүтээлд ихэвчлэн “чимэг” болсон дүрүүдийг бүтээсэн.
Өдгөө 50 насны босго алхсан тэрбээр үеийнхэн дундаа жавхаалаг, царайлаг, хөөрхөн, хөгжилтэй, золбоолог гэх “өнгө”-өөр ялгардаг. Жүжигчин бүсгүйн хувьд МУГЖ П.Эрдэнэзаантай СУИС-ийн жүжигчний ангийг дүүргэсэн ангижавууд. Их сургуулиа төгссөний дараагаар П.Эрдэнэзаан урлагтаа үнэнчээр зүтгэсэн бол, түүний ангийн найз О.Дуламсүрэн амьдралын эрхээр бизнесийн ертөнцөд хөл тавьж, БНСУ-ын Жежү арлаас “ориг” жимсүүдийг монголчууддаа нийлүүлдэг байжээ. Түүнчлэн тэрбээр, бизнес болон нийгмийн идэвхээрээ манлайлдаг JCI олон улсын байгууллагын гишүүн ажээ.
Ажил амьдралаа эмхэлж, санхүүгийн эрх чөлөөнд хүрсэн жүжигчин бүсгүйг урлагт эргэн ирэхэд том түшиг тулгуур болсон хүн нь түүний найз УДЭТ-ийн урдаа барьдаг жүжигчин, МУГЖ Ц.Баясгалан, “Маск” хамтлагийн захирал МУГЖ П.Эрдэнэзаан нар байсныг тэрбээр ойр дотныхондоо онцлон ярих дуртай юм билээ.
Ямартаа ч, “биеэ засч, гэрээ зассан” жүжигчин О.Дуламсүрэн өдгөө нийгмийн хариуцлагынхаа төлөө өөрийн хобби, хүсэл мөрөөдлөө биелүүлж ийнхүү урлагт дахин хөл тавьсанд баяр хүргэе.
