Монгол Улсын Гавьяат тамирчин, олимп, ДАШТ-ээс боксын төрлөөр мөнгөн медаль хүртсэн Н.Төгсцогтыг мансуурсан байсныг ЦЕГ-ын Хар тамхитай тэмцэх газрын ажилтнууд илрүүлжээ. Түүнийг Сүхбаатар дүүргийн I хорооны нутаг дахь “Шангри-Ла” зочид буудалд зүй бусаар биеэ авч явж байхад нь цагдаагийнхан өнгөрсөн сарын 28-нд үзлэг шинжилгээ хийхэд мансууруулах бодис хэрэглэсэн нь тогтоогдсон аж.
Эх сурвалжуудын мэдээлж буйгаар түүнийг олон нийтийн газар зүй бусаар биеэ авч явсан гэж үзэн Зөрчлийн тухай хуулийн 5.1-3-ын “Мансуурсан нь эрүүгийн хариуцлага хүлээлгэхээргүй бол хүнийг нэг зуун нэгжтэй тэнцэх хэмжээний төгрөгөөр торгох, эсхүл албадан сургалтад хамруулж долоогоос гуч хоногийн хугацаагаар баривчлах шийтгэл оногдуулна” гэх заалтын дагуу зөрчлийн хэрэг нээн Сүхбаатар дүүргийн Цагдаагийн газрын I хэлтэст шалгаж байгаа гэнэ.
Түүний биологийн дээжид хийсэн шинжилгээгээр нэг бус төрлийн мансууруулах бодис илэрсэн бөгөөд нэлээд удаан хугацаанд тэдгээрийг хэрэглэсэн байж болзошгүй гэж үзэх хүмүүс байгаа юм.
