Тулгар төрийн 2233 жил, Их Монгол Улсын 818 жил, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ойн баяр наадмын нээлт өнөөдөр 11:00 цагт эхэлсэн.
Жил жилийн наадмаас шүүмжлэл дагуулах болон магтуулах үзүүлбэр гардаг уламжлалтай бөгөөд энэ жилийн шилдэг үзүүлбэр нь дуучин Б.Алтанжаргал, Г.Эрдэнэчимэг, Б.Батцэцэглэн нарын “Мөнх тэнгэрийн хурай” дуу байв.
МУГЖ Самандын Жавхлангийн үг, Цэн.Эрдэнэбатын ая “Мөнх тэнгэрийн хурай” дууг уртын дууны гурвал морь унаж, өөрсдийн өнгө аясаар дуулсан нь наадамчин олонд ихэд таалагдан огшоосон юм.
Моринд гарамгай, эрэмгий Монгол хүнд үзэсгэлэн гоо, авьяас, донж хэрхэн хосолж байгааг уртын дуучид өөрсдөөрөө харуулсан нь жуулчдад мөн таалагдсан гэдгийг хэлж байна.
Уртын дуу, ардын дууг гайхалтай амилуулдаг хайртай дуучдаа нэг тайзнаа хамт дуулж байгааг харах нь олон нийтэд таатай санагдсан нь энэ биз ээ… Гайхалтай дуучдын энэ өдрийн зургийг хүргэж байна.
