Ж.Хатанбаатарыг эрх бүхий албан тушаалтан, жолооч нарынх нь хамт хойшлуулшгүйгээр баривчиллаа

Дүүргийн эрүү, иргэний хэргийн хялбар ажиллагааны анхан шатны тойргийн шүүх өнөөдөр “элэгний” гэж алдаршсан, Ардын эмч Жамбалын Хатанбаатар тэргүүтэй хүмүүсийг хойшлуулшгүй ажиллагааны хүрээнд шүүхийн зөвшөөрөлгүйгээр баривчилсан асуудлыг хянаад зөвшөөрөл олгосон байна.

 Хүүхдийн эрхийг хамгаалах, тусламж, дэмжлэг үзүүлэх, сургалт семинар зохион байгуулах, төсөл хөтөлбөр хэрэгжүүлэх чиглэлээр байгуулсан “Монголын СОС-ын хүүхдийн хотхоны нийгэмлэг” НҮТББ-ын Удирдах зөвлөлийн дарга Ж.Хатанбаатарыг гүйцэтгэх захирал Б.Батцэцэг, санхүү хариуцсан захирал Ц.Бадамсэд, жолооч Г.О, Д.Э нартай хамт “СОС Киндердорф интернэйшнл” олон улсын байгууллагын санхүүжилт болох олон тэрбум төгрөгийг завшсан хэрэгт АТГ-ын Мөрдөн шалгах хэлтэст шалгаж эхэлсэн.

Тэгвэл дээрх хүмүүсийг сэжигтнээр баривчлах саналыг 2025 оны тавдугаар сарын 20-ны 21.30 цагт шүүхэд НПГ-аас гаргасан аж. Шүүхээс Эрүүгийн хэрэг хянан шийдвэрлэх тухай хуулийн 31.4-1.3 дахь заалтад “мөрдөгч, прокурор, шүүгч, хохирогч, гэрч, хамтран гэмт хэрэг үйлдсэн хүнийг дарамтлах, сүрдүүлэх, амь нас, эрүүл мэндэд нь халдах үндэслэл байгаа бол”, 31.4-1.4-т “гэмт хэрэг үйлдсэн гэх хангалттай үндэслэл байгаа, түүнчлэн дахин гэмт хэрэг үйлдэх, гэмт хэргээ төгсгөх үндэслэл байгаа бол”, 31.4-1.5-д “нотлох баримтаа устгах, өөрчлөх, хуурамчаар үйлдэх, эсхүл гэрч, хохирогч, хамтран гэмт хэрэг үйлдсэн хүнд хууль бусаар нөлөөлөх үндэслэл илэрсэн бол сэжигтнийг баривчилна” гэж хуульчилсны дагуу хойшлуулшгүйгээр баривчлах саналтай шүүгч танилцаад хуульд заасан үйл баримтууд тогтоогдсон гэж үзэн зөвшөөрөл олгосон юм байна.

Сэжигтнүүдэд авсан шүүхийн зөвшөөрлөөр баривчилж саатуулсан хугацаа нь Эрүүгийн хэрэг хянан шийдвэрлэх тухай хуульд зааснаар 48 цагаас хэтэрч болохгүй бөгөөд Ж.Хатанбаатар, Б.Батцэцэг, Б.Бадамсэд, Г.О, Д.Э нарыг 2025 оны тавдугаар сарын 21-ний 09.00 цагаас сэжигтнээр баривчилсан аж. Мөрдөн шалгах ажиллагааны явцад үргэлжлүүлэх хорьж шалгах шаардлагатай гэж үзвэл уг 48 цагийн хугацаа дуусахаас өмнө прокурорын байгууллагаас шүүхэд дахин хүсэлт гаргах юм.