Цахим ертөнцөд өчигдрөөс нэгэн хөөрхөн жаалын зураг тархаж, “Хэн нэгэн даргатай адилхан” байгаа талаар хэлэлцсэн. Үүний тайлал болгож, Ерөнхий сайдын хэвлэлийн төлөөлөгч Ч.Ганзориг ““Хүмүүсийн цагаахан хөөрхөн талцсан постууд, асуусан чатууд их ирж байгаа тул хариулт өгье.
Ерөнхий сайд У.Хүрэлсүхийн багынх нь зураг нь шүү. Инээд бие биендээ бэлэглэсэнд нь Ерөнхий сайд талархаж байгааг дамжуулж байна. Хар зургийг өнгөт зураг болгосон хүнд талархаж байна” хэмээн бичжээ.
Гэвч энэ нь гэрэл зурагчин Л.Батаагийн 2018 оны 11 сарын 10-нд Хөвсгөл аймгийн Эрдэнэбулган суманд авсан зураг бөгөөд хүүгийн нэрийг Намхай гэдэг юм байна.
Хэдийгээр Ерөнхий сайд У.Хүрэлсүх энэхүү зургийг өөрийн зураг хэмээн “таньж”, үүнийг нь хэвлэлийн төлөөлөгч нь андуурч дамжуулсан боловч, магадгүй Ерөнхий сайд маань багадаа үнэхээр ийм дүр төрхтэй байгаад, хэзээ нэгэн цагт Намхайтай уулзаж, бага насандаа очсон мэт болох ч юм бил үү, хэн мэдэх вэ.
