Урлагийн сайхан гэр бүлийн амьдрал хайраар дүүрэн жаргалтай. Тэд хамтдаа урлагийн шимийг хүртэж, бүхий л цаг үед бие биенийгээ дэмжин бусдаас илүү бие биенийгээ ойлгодог. Үлгэр жишээ болсон урлагийн гэр бүлийн төлөөлөл болсон нэгэн эрхэм хүндэт хосуудыг та бүхэндээ танилцуулж байна.
Монголын ард түмэнд “Бид мартахгүй” уран сайхны киноны Аюуш баатрын дүр, “Ирж яваа цаг” киноны Готовын дүрээр танигдсан жүжигчин бол Бямбажавын Базаррагчаа юм. Сүүлийн арав гаруй жил хүний нутагт ажиллаж хөдөлмөрлөж кино урлагаасаа хөндийрсөн тэрээр “Учрал” киноны аавын дүр, Боловсрол телевизийн бүтээл “Хөгжилтэй гэр бүл” олон ангит киноны туслах дүр, “Маш нууц” киноны хорих ангийн даргын дүрийг бүтээн урлагтаа буцаж ирсэн.
Түүний гэргийг С.Сарангэрэл гэдэг. Хоёр жүжигчинг гэр бүл гэдгийг хүмүүс тэр бүр мэддэггүй. Украины Харьков хотод жүжигчний мэргэжлээр суралцаж, төгссөн түүнийгш “Ламбугайн нулимс”, “Хайрын нулимс хатдаггүй”, Монголын анхны телевизийн цуврал кино “Эзэнгүй айл” зэрэг бүтээлүүдэд тоглосоор нь сайн мэднэ.
Жүжигчин Б.Базаррагчаа 1992 онд “Амилсан чөтгөр” кинонд дуу оруулж байх үеэрээ эхнэрээ олж харсан гэнэ. Тэд нэг хүү, нэг охинтой. Гэр бүлээрээ 1997 онд Солонгос улсыг зорьж тэнд 17 жил ажиллаж хөдөлмөрлөсөн байна.
