Хуульчийн хувьд залуустаа анхааруулж нийтлэг тохиолдсоор байгаа олон харамсалтай түүхийн нэгийг энд өгүүлье. Залуу хосууд 2010 онд танилцаж, 2012 онд гэр бүл болжээ.
Үүнээс хойш хоёр биедээ болоод одоо 8 настай жаал хүүгээ өсч том болоход нь ч гаргаж чадаагүй цаг хугацаагаа ажилдаа зориулжээ.
Ажлаа хамгийн сайнаар хийж, мөнгө их цуглуулж, тэгээд хамаатныхаа хашаанд гэр барьж эхэлсэн амьдралаа үүрд өөрчилж БАЙРТАЙ болохыг л хүсчээ.
4 жилийн турш хурааж цуглуулж байрны урьдчилгаа арай хийж цуглуулжээ. За ингээд 2016 онд байр авахаар болтол найман хувийн зээлийн шаардлага хангагдсангүй.
Улмаар нийтийн дунд нийтлэг тархсан ХУВЬ ЛИЗИНГ гээчийг хийхээр болж, гэрээ контракт байгуулаад мөрөөдлийн байрандаа нүүж оров.
За ингээд урьдчилгаагаа өгчихөөд сар бүр саяыг төлсөөр саяхан байрныхаа бүх мөнгийг төлж дуусаад ГЭРЧИЛГЭЭ-гээ авахаар боллоо.
Анх байр авахдаа ч олж хараагүй байсан ордероо ингэж нэг авахаар болов. Байраа албан ёсоор шилжүүлж авчихаад, баяраа тэмдэглэж болзоонд явах тухайгаа ч ярьж байлаа.
Гэтэл байр зарсан эзэн БАЙРЫГ БАНКНЫ БАРЬЦААНД ТАВЬСАН байлаа. Авсан зээлээ төлөлгүй явсаар удахгүй байр хураагдахад бэлэн шүүхэд маргаан явж байгааг ч мэдэв.
Одоо яаах вэ? Дээшээ харахад тэнгэр хол, доошоо зангаад газар хатуу. Найман жилийн турш зүтгэсэн зүтгэл нь ингээд салхинд хийсэхэд бэлэн болсон байлаа. Яг хаана алдав.
Хичээж зүтгэсэндээ юу?,
байртай болох гэж яарсандаа юу?
Юун дээр алдав. АРАЙ ИЛҮҮ НУХАЦТАЙ ХАНДАХ дээр л алдаж, арай илүү хариуцлагатай байх дээр л алдсан байв.
Үл хөдлөх хөрөнгийг бусдад шилжүүлэх боломжгүй байлгах арга хэрэглэх, гэрээгээ нотариатаар оруулаад эрсдлийг сонсчихсон бол, энгийндээ ЯАРСАН УЧРААС ДААРАХ нөхцөл үүсчээ.
Их хэмжээний хэлцэл, хөрөнгө худалдан авах ажиллагааг хийхдээ нухацтай хандахгүй бол хэцүүддэг цаг иржээ. Зуу зуугаараа хулхидуулж, байр ч гүй мөнгө ч гүй болсон, байрандаа орсон ч гэрчилгээгээ олж авч чадахгүй нөхцөл үүсч байгааг анхаараасай.
Болоод өнгөрсний араас ХУУЛЬЧИД бид ажилласан ч гэсэн сайн үр дүн гарахгүй байх нь олонтаа. Тэр болгонд залуу хосыг харахад ЗҮРХ ЗҮСМЭЭР л болдогдоо.
Нэг ч гэсэн залуус алдахаасаа өмнө анхаараасай билээ.
Амарбат Үүрцайх
