Цэл залуугаараа МУГЖ цолоор энгэрээ мялааж асан Г.Ариунбаатар анх гарч ирэхдээ л давилуун, сагсуу гэгдэж байв.
Сонгодог урлагийн олимп гэгддэг М.Глинкийн нэрэмжит Олон улсын дуурийн дуулаачдын 24 дэх удаагийн тэмцээнээс Гран при хүртэхдээ 21, ОХУ-д болсон 1600 гаруй дуучид оролцсон Муслим Магомаевын нэрэмжит олон улсын дуурийн дуулаачдын наадмын тэргүүн байрыг эзлэхдээ тэр 26 настай байв. “Дуурийн дуучин гээд би Бөхийн өргөөнд дуулахгүй байлтай биш” гэж даруухан загнаж байсан хархүү өдгөө «Мариинский» театрын гоцлол дуучин болохын сацуу дэлхийн хэмжээний аялан тоглолтуудаа хийж буй.
Англид тоглох үеэр нь Английн хатан хаан өргөөндөө урьж Букингемийн ордонд хатан хааны гэр бүлтэй оройн зоог хамт барьсан нь жирийн Монгол хүүд заяасан онцгой хувь тавилангийн илэрхийлэл гэлтэй. Ийн 29 насан дээрээ дэлхийд тоогдсон Монгол сонгодог хархүү алдрын оргилд хүрсэн ч хаа очиж даруухан болчихов уу гэлцэх болжээ.
Түүний ийм өндөр амжилтад аваачсан азын тоо нь 9. Уг тоогоо бэлэгдэж өөрийнхөө автомашины дугаарыг 9999 болгосон гэнэ лээ.
Мэдээж утасны дугаар нь ч 99-тэй.
Хувийн амьдралын тухайд гурван эхнэрийн нүүр үзсэн ч, хүний өөрийн 7 хүүхдийн эцэг болж өдгөө элэг бүтэн амьдарч буй. Өмнөх амьдралаа, үр хүүхдүүдээ ч олноос нуудаггүй Г.Ариунбаатарын хувьд урлагийн амжилт ч, хувийн амьдрал ч аль аль нь эрт эхэлжээ.
Одоо түүнийг онгирсон ч хэн ч юу ч хэлэхгүй болтол өндөрлөгт тэр нэгэнт хүрчээ. “Чадаж байвал онгирох хэрэгтэй” гэж хэлэх дуртай хархүү цагаа тулсан чинь даруухан юм гэгдэн ард түмэнд хайрлагдах болжээ.
