“The Voice of Mongolia” шоуны хоёрдугаар улирлын шилдэг оролцогч Б.Оюу өөрийн өвөрмөц хоолойгоороо бусад дуучдаас ялгардаг.
Тэрээр шоуны дараагаас эхлэн дахин хүмүүсийн сэтгэлд хүрсэн хуучны дууг дуулахгүй байхаар шийдсэн гэнэ. Энэ тухайгаа “Хуучны дуунуудыг сэргээн дуулж, хөгшчүүдээ мөлжиж амьдрахыг хүсдэггүй. Шинэ бүтээл, шинэ санаа гаргахын тулд хичээнгүйлэн ажиллаж байгаа” хэмээн фенүүдтэйгээ лайваар уулзаж байх үедээ хэлэв.
“The Voice of Mongolia” шоуны финалын шатанд Б.Оюу Хурд хамтлагийн “Буцааж нэхэхгүй хайр” дууг амилуулж, олон хүний нулимсийг урсгасан. Энэ тухайгаа “Буцааж нэхэхгүй хайр” дууг дуулаад зурагтаар цацагдсаны дараа миний инстаграм хандалт огцом өссөн. Тэгээд ороод харсан чинь дийлэнх нь 25-35 насны эмэгтэй хүмүүс байсан. Ингээд бодохоор би энэ дуугаараа үе тэнгийнхээ ганц бие ээжүүд, амьдралын хүнд ачааг ганцаараа нуруун дээрээ үүрч яваа эмэгтэй хүмүүст, ээждээ хайртай гээд хэлж чадалгүй яваа хүн бүрт ээжийгээ хайрлаж яваарай гэсэн маш том ухаарлыг өгөхийг хүссэн. Энэ дууг дуулахад миний хувьд сэтгэл зүйн маш том золиосыг гаргасан. Ээжийгээ өмнөө суулгачхаад дөнгөж охинтойгоо уулзаж байсан тэр үеийн мэдрэмжийг одоо ч ярихад хоолой зангирдаг. Дуугаа дуулж байх үед үзүүлбэрээ гоё үзүүлэх юмсан гэж бодсон ч ээжийгээ хараад өөрийн эрхгүй хоолой зангирч байсан.
Яг л тийм нандин сэтгэгдэлтэй дуулсан болохоор энэ дуу хүмүүст их хүрсэн” хэмээн хэвлэлд ярьж байв.
