ХӨСҮТ-ийн захирлаар ажиллаж байсан Д.Нямхүүг эрх мэдэл, албан тушаалаа урвуулсан хэрэгт холбогдуулан АТГ-аас шалгаж, хойшлуулшгүй ажиллагааны хүрээнд НПГ-ын хяналтын прокурорын зөвшөөрлөөр энэ сарын 5-ны үдэш 48 цагийн хугацаатай албадан саатууллаа.
Эрүүл мэндийн салбарынхан цар тахлын үед ямар нэг сонгон шалгаруулалтгүйгээр худалдан авсан бараа, ажил, үйлчилгээнүүдийг АТГ-ынхан нарийвчлан шалгаж эхлээд нэлээд хугацаа өнгөрч буй бөгөөд энэ хүрээнд ХӨСҮТ-д худалдан авсан техник, тоног төхөөрөмжүүдтэй холбоотой мэдээллийг нягтлан захирал асан Д.Нямхүүг эрх мэдлээ урвуулсан байж болзошгүй гэж үзсэн байна. Тодруулбал, ДУБ гэх компаниас дээрх төвд өндөр үнээр компьютер томографын аппарат 2020 оны гуравдугаар сард худалдан авахдаа тухайн аж ахуйн нэгжийнхэнд давуу байдал олгосон байж болзошгүй гэж буруутгаж буй аж. Түүнээс гадна үндэслэлгүйгээр хөрөнгөжсөн гэх үйлдэлд холбогдуулан шалгаж байгаа юм.
АТГ-ынхан мөрдөн шалгах ажиллагаа явуулж, гэрт нь нэгжлэг хийгээд үнэт чулуу, валют хураан авснаас гадна төрийн өмчийг хувьдаа завшиж, үндэслэлгүй хөрөнгөжсөн байж болзошгүй үйлдэлд нь нотлох баримт болох бичиг, гэрчилгээ зэрэг зүйлс гарсан байна.
Үүнтэй холбоотойгоор Д.Нямхүүг ХӨСҮТ-ийн захирлаар ажиллаж байхад ЭМЯ-нд удирдах алба хашиж байсан болон дээрх төвд түүний удирдлагад ажиллаж байсан хүмүүс, нэр бүхий аж ахуйн нэгжийн гүйцэтгэх захирал зэргээс АТГ-ынхан гэрчийн мэдүүлэг авч эхэлсэн гэнэ.
