УДЭТ-ийн сайхан бүсгүйчүүдийн нэг бол МУГЖ Ж.Оюундарь. 
Удам дамжсан уран бүтээлч гэгдэж яваа тэрээр өдгөө тус театртаа 36 дахь жилдээ ажиллаж байна.
Тэрээр манай сайтын дуранд өртсөн юм.
Зах зээлийн хүнд хэцүү он жилүүдэд театраа орхиогүй тэрээр Унгар улсад эмчээр суралцах хуваарь авч байсан ч, урлагийн хүн болно хэмээн эрс шийдэж байсан гэдэг. 
Энэ тухайгаа тэрээр “Уг нь бас тэр үедээ би яаж зүгээр байх вэ, эмч болох шалгалт өгөөд Унгар явах хуваарь авчихсан байсан юм шүү. Тэгээд эмчээрээ яваагүй ээ, жүжигчин л болно гээд үлдсэн.
Аав минь өөрөө уг нь эмч болох гэж байсан хүн шүү дээ. Уг нь бол эхлээд урлагийн хүн болно гээд шалгалт өгөөд тэнцсэн байсан гэсэн. Тэгсэн чинь хотод очих газаргүй, хаашаа явахаа мэдэхгүй залуу тэнцсэн сургуульдаа дараа нь очих гээд хайгаад олоогүй юм гэнэ лээ. Тэгж хайж яваад нэг сургууль байхаар нь явж ороод бас шалгалт өгөөдөхсөн чинь Анагаах байж таараад тэнцчихгүй юу.
Тэгээд л нөгөө урлагийн сургуулиа мартаад Анагаахдаа сураад явж байж. Ингээд сурч байхдаа урлагийн үзлэгт орсон юм гэнэ лээ. Тухайн үед урлагийн үзлэгийг нь Драмын хэдэн мундаг жүжигчид ирж шалгажээ. Ингээд үзэж байхдаа аавыг минь олж хараад, “Хүүе ээ энэ авъяастай хүүхэд чинь энд юу хийж яваа юм бэ, урлагийн л хүн болох нөхөр байна даа” гээд нөгөө сургууль руу нь аваад явсан гэсэн.
Тэгсэн чинь нөгөө сургуулийнх нь захирал “Хүүе ээ энэ, манайд шалгалт өгөөд тэнцсэн хүүхэд ирэхээ байгаад алга болихсон юм, хаанаас олоо вэ” гээд бөөн инээдэм болсон гэнэ лээ. Аав минь эмч болох гээд Анагаахад сурч байсан болхоор намайг эмч болгох сонирхолтой байсан” гэжээ.
