Комедиан Д.Амартүвшин буюу Амарааг танихгүй хүн ховор. Сонгодог либерал үзэлтэй, түүндээ туйлын үнэнч тэрбээр хүний эрх, эрх чөлөөний төлөө дуу хоолойгоо идэвхтэй хүргэн, үеийнхнийгээ манлайлж яваа нэгэн билээ. 
Тайзан дээр комеди хийн, бусдад инээд хөөр бэлэглэдэг түүнийг комедиан, ганц бие аав, сонирхолтой контентууд хийдэг гэдгээс өөрөөр хэр сайн мэдэх вэ. 
Тэр “Гомо”, “Хөлсөөр жагсагч, тэмцэгч” гэх мэт элдвээр хэлүүлэн барин юуны төлөө тэмцэж, дуугарч яваагаа тэрээр либерал үзэлтэйгээ холбон тайлбарладаг.
Дарь-Эхэд төрж, өссөн Амараа айлын ууган хүүхэд, хоёр дүүтэй. Гэр хороололд төрж өссөн тэрээр дэггүй, сахилгагүй нэгэн байсан гэдэг. Өөрийнхөө өсч төрсөн орчноороо бахархадаг түүний хамгийн их сонсож өссөн үг нь “Болохгүй” тэгж болохгүй, ингэж болохгүй” гэх үг ажээ.
Тэрээр энэ тухайгаа “Болохгүй гэх тусам “Яагаад өөрийнхөөрөө амьдарч болохгүй гэж. 
Миний амьдралыг яагаад заагаад байгаа юм бол” гэсэн бодол өөрийн эрхгүй надад төрнө. Олонх хүүхэд “Зөв”, “Энэ л супер” гэж бодож буй зарим зүйл миний хувьд өөр байлаа. Хип хоп бүүм болж байсан үе. Бүхий л хүүхэд хип хоп хөгжимд дурлаж, шимтэж байхад би рок сонсож явсан. “Нирвана” хамтлаг миний анхны шүтээн байлаа. Есдүгээр ангидаа уруул, чихээ цоолуулж байснаа тод санадаг. Сонсож, сонирхож буй зүйлээсээ авхуулаад би бусдаас өөр хүүхэд байсан.
Үүнийг дагаад өөрийгөө хэрхэн илэрхийлэх, хувцаслалт хүртэл өөрчлөгдсөн. Би багаасаа бусдын эрхийг хүндэлдэг, эрх чөлөөний мэдрэмжтэй өссөн, одоо эргээд бодоход. Цэцэрлэгт байхын л тийм байсан” гэжээ.
