Өөрсдийн авьяас билгээрээ монголчуудын хайр хүндэтгэлийг хүлээсэн хүмүүс бол “Чингис хаан” хамтлагийн дуучин, Ардын жүжигчин Д.Жаргалсайхан, “Өнгөт инээд”-ийн жүжигчин, МУГЖ С.Өлзийхүү нар.
Тэгвэл тэдний залуу насны ховор зураг цахим хуудаснаа тавигдсан байна.
“Буржгар” Д.Жаргалсайханы хувьд өдгөө 64 настай. Тэрээр 1979 оноос Монголын рок, поп урлагийн анхдагч болох “Баян Монгол” чуулгад дуучнаар, 1980 оноос Улсын Филармонийн “Соёл-Эрдэнэ” хамтлагт дуучин, хөгжимчнөөр ажиллаж эхэлжээ. 1983 онд Монголын Ардын армид цэргийн алба хааж цэргийн “Оч” хамтлагт дуучин, хөгжимчин, удирдагчаар нь хоёр жилийн хугацаанд ажиллаж байсан билээ.
Харин С.Өлзийхүү гавьяатын хувьд 55 настай бөгөөд нисгэгч Санжсүрэнгийн ганц охин юм. Тэрээр 1985 онд нийслэлийн 24 дүгээр дунд сургуулийг төгсөөд АУДС-д элсэхээр уралдаант шалгалтад орсон боловч тэнцээгүй тул сувилагч мэргэжлийг сонгожээ. 1987 онд АУДуС-ийг “онц” дүнтэй төгсөөд Клиникийн нэгдүгээр эмнэлгийн сэхээн амьдруулах тасагт гавьяат эмч Лхагважавын удирдлаган дор ажлын гараагаа эхэлжээ. Дуулж, хөгжимдөх авьяастай, урлаг, уран сайхны арга хэмжээнд оролцож явдаг залуухан сувилагч бүсгүй “Бүх ард түмний урлагийн наадам”-аас мөнгө, хүрэл медаль хүртэж байв.
Түүнийг жүжигчний мэргэжил эзэмшихэд авьяасаас нь илүү дунд сургуулийн найз О.Энхтуулынх нь ятгалга нөлөөлсөн гэдэг. 1992 онд СУИС-ийн кино драмын факультетыг драмын жүжигчний мэргэжлээр төгссөн улаан дипломтой жүжигчин бүсгүй Үндэсний Жүжгийн Академик театрт жүжигчнээр хуваарилагдаж, урлагийн алтан тайзнаа хөл тавьжээ.
