24 настай загвар өмсөгч София Жирау Victoria’s Secret-ийн сурталчилгаанд оролцсон анхны дауны синдромтой хүн боллоо.
Тэрээр Пуэрто-Рикогийн загвар өмсөгч бусад 17 эмэгтэйн хамт гарч ирсэн юм. Виктори Секретсийн зүгээс энэ удаагийн дотуур хувцасны загварын цуглуулга нь хэнд ч ая тухтай байдлыг бүтэн өдрийн турш мэдрүүлэх “Үүлэн хайр” нэртэй багц учраас бүх насны, янз бүрийн онцлогтой эмэгтэйчүүдийг хамруулахыг хичээсэн гэсэн юм. Тэр ч бүү хэл “Үүлэн хайр” загварын цуглуулгад мэргэжлийн модель биш бүсгүйчүүдийг оролцуулжээ.
Виктори Секретсийн Дауны синдромтой анхны модель болсон София Жирау инстаграм хуудсаараа дамжуулан сэтгэл хангалуун буйгаа илэрхийлж, “Миний мөрөөдөл биелсэн, энэ бол дөнгөж эхлэл” гэж инстаграмм хуудсандаа бичжээ. Жираугийн хувьд өмнө нь 2020 оны 2-р сард Нью-Йоркийн загварын долоо хоногт алхсан дауны синдромтой цөөхөн загвар өмсөгчдийн нэг болж байсан.
Тэрээр өөрийн зорилгоо бусдыг мөрөөдлөө биелүүлэхэд нь тусалж, урамшуулах явдал гэдгийг олон нийтийн мэдээллийн хэрэгслээр дамжуулан онцолж байна.
